General Santos City – Nasamsam ng mga tauhan ng Bureau of Fisheries and Aquatic Resources-SOCCSKSARGEN (BFAR-12), ang isang bagahe na naglalaman ng hindi bababa sa 43 buhay na piranha mula sa isang bus na dumating sa public terminal sa General Santos City.
Sa ulat ni Efren Mamac sa GMA Regional TV One Mindanao nitong Biyernes, sinabing natagpuan ang mga isda na nakalagay sa mga plastic bag nang buksan ang bagahe para sa inspeksyon noong Martes, Nobyembre 25, 2025.
Binili umano ang mga piranha, isang ipinagbabawal na species, via online ng ilang pet keepers sa lungsod mula sa isang nagbebenta sa Cagayan de Oro City.
Pansamantalang isinailalim ng mga awtoridad ang kustodiya ng isang 16-anyos na binatilyo, na isa sa mga bumili, at pumunta sa terminal para kunin ang 10 piranha na binili niya sa halagang nasa ?2,000.
“Ang nakakalungkot, out of curiosity nga itong ating mga fishkeeper na mga bata, umo-order nga sila, bumili and hindi nila alam na bawal… since minor yung consignee, hindi naman natin puwedeng ikulong… kinausap na lang siya kasama yung parents niya para i-educate na bawal yun,” ayon kay BFAR-12 Senior Fisheries Regulatioin Officer, Edison Pesario.
Ipinaliwanag ng BFAR na ipinagbabawal ang pagpasok at pagbebenta ng piranha mula pa noong 1979 sa ilalim ng Fisheries Code of the Philippines.
Dagdag pa ng mga awtoridad, ang mga piranha ay kilalang highly invasive at maaaring magdulot ng malaking pinsala sa natural ecosystems kapag nakatakas sa mga katubigan sa bansa.
“Kaya nang inamyendahan yung Republic Act 8550 o Fisheries Code of the Philippines, inamyendahan ng Republic Act 10654, nasa section 1-4 na anumang gagawin or mag-introduce or magdadala ng anumang uri ng isda galing ng ibang bansa or kahit saan na-i-introduce sa Pilipinas is mahigpit na ipinagbabawal. Sa R.A 10654, yung multa, lumaki na up to P5 million,” ayon kay Pesario.
Pinaniniwalaang ang fry o juvenile na piranha ay nagmula sa Indonesia at pinalaki sa bansa para ibenta.
Nakipag-ugnayan na ang BFAR-12 sa mga opisyal ng BFAR-10 upang matukoy at mahuli ang nagbebenta sa Cagayan de Oro City.
Dadalhin naman ang mga piranha sa BFAR Central Office para sa pagsusuri
