Nagpalabas ng bagong direktiba ngayon ang State Department ng Estados Unidos, sa ilalim ng pamamahala ni US President Donald Trump, patungkol sa bagong direktiba sa mga consul at embahada na isaalang-alang ang pagproseso ng mga visa ang mayroong chronic health issues ng mga imigrante, kabilang ang obesity.
Inirerekomenda rito na huwag pahintulutang makakuha ng immigrant visa papasok sa Amerika ang mga taong overweight, bilang bahagi umano ng hakbang ng administrasyong Trump upang higpitan ang hindi kanais-nais na paglalakbay sa US.
Kabilang din sa mga medikal na kondisyong binanggit ang mga cardiovascular disease, respiratory disease, cancer, diabetes, metabolic diseases neurological disease at mental health condition.
Binigyang-diin din sa direktiba ang pagsusuri sa mga aplikante ng immigrant visa kung may sapat itong pinansyal na kakayahan na tustusan ang pangangalaga sa sarili nang hindi umaasa sa tulong ng gobyerno o suporta ng institusyon.
Kinumpirma naman ni Tommy Pigott, principal deputy spokesperson ng State Department, ang direktiba at sinabing, “It’s no secret the Trump administration is putting the interests of the American people first.”
“This includes enforcing policies that ensure our immigration system is not a burden on the American taxpayer,” dagdag pa niya.
