MANILA, Philippines – Nagpadala ang Pilipinas ng una nitong komersyal na shipment ng fresh Carabao mangoes patungong Toronto, Canada, nitong Miyerkules, Hunyo 3.
Ang nasabing shipment ay naglalaman ng isang metrikong toneladang fresh mangoes na inani mula sa hilagang Luzon at Zambales, na ibinigay ng mga Philippine exporters na Hi-Las Marketing Corporation at Castillo Import Export Ventures Inc. Ayon sa Department of Agriculture (DA), may panibagong shipment na nakatakda sa susunod na linggo.
Ayon naman sa Department of Trade and Industry, ang unang padala ng 400 karton ay nakatakdang sumabay sa pagdiriwang ng Philippine Independence Day sa Toronto sa Hunyo 12.
“Ang mangga, tulad ng iba pang high-value commercial crops — ito ang gusto nating i-promote upang mas lumaki ang dollar earnings ng ating bansa,” pahayag ni DA spokesman Arnel de Mesa sa isang press briefing noong Miyerkules.
Ani De Mesa, ang mangga ay niche product ng Pilipinas at “ang ibang bansa ay handang bumili ng mga produktong ito sa premium price.”
Ayon kay DA Undersecretary Philip Young, nagkaroon ng malapit na koordinasyon ang kanilang tanggapan kasama ang Department of Trade and Industry at Department of Foreign Affairs upang maisakatuparan ang unang shipment sa Toronto. Idinaos ng mga opisyal ng gobyerno at kinatawan ng pribadong sektor ang send-off ceremony noong Miyerkules sa Philippine Airlines International Cargo Terminal sa Pasay City.
Sa kasalukuyan, nasa negosasyon pa ang Pilipinas at Canada para sa potensyal na free trade agreement. Noong 2024, inanunsyo ng dalawang bansa ang exploratory talks na nagpapatibay sa kanilang pangako sa “open, fair, and inclusive trade.”
Bukod sa mangga, ang pangunahing fruit exports ng Pilipinas ay saging at niyog. Nakatutok ang DA sa pagpapalawak ng agriculture export portfolio ng bansa, kabilang na ang high-value crops tulad ng saging, cacao, pomelo, rambutan, durian, at ube.
