Iba, Zambales – Mas pinalakas ngayon ng lokal na pamahalaan ang adhikaing maging “child-friendly” ang bayan, sa pamamagitan ng pormal na paglulunsad at pagtanggap sa bagong “Iba Municipal Playground” sa isang seremonyang dinaluhan ng mga kinatawan ng pamahalaan at masayang komunidad.
Ang nasabing proyekto, na ngayon ay opisyal nang handog sa mga mamamayan, ay itinayo gamit ang “P20-Milyong Incentive Fund” mula sa pagkamit ng LGU Iba ng “ Seal of Good Local Governance (SGLG)” noong nakaraang taon.
Isa itong kongkretong patunay na ang pagkilala sa mahusay na pamamahala ay nauuwi sa mga tunay at nakikitang benepisyo para sa publiko.
“Ang playground na ito ay higit pa sa mga kulay at kagamitan. Ito ay symbolo ng ating pag-invest sa kaligayahan at kalusugan ng ating mga anak—ang mga pinakamahalagang yaman ng ating bayan,” pahayag ni Mayor Irenea Maniquiz-Binan sa kanyang talumpati.
Binigyang-diin niya na ang ligtas at modernong palaruan ay magsisilbing “tahanan ng masasayang alaala” para sa mga batang Ibeño.
Katuwang ni Mayor Binan sa ribbon-cutting at turn-over ceremony sina Dir. Araceli A. San Jose, CESO III, Regional Director ng DILG Region III, at Acting PD Melissa D. Nipalng DILG Zambales.
Parehong naghatid ng mensahe ng pagbati at pagkilala sa LGU sa paggamit ng insentibong pondo sa isang proyektong direktang makaaapekto sa kalidad ng buhay ng mga residente.
Agad namang sinalo ng mga batang naroon ang bagong pasilidad.
Maingay na halakhakan at pagkukulitan ang bagong playground na puno ng mga swing, slide, climbing structures, at malawak na lugar para sa pagtakbo at paglalaro.
“Napakasaya po! Ngayon, may malapit at malinis na kaming mapaglalaruan tuwing hapon. Salamat po, Mayor!” sabi ni “Jana”, 9 taong gulang, isa sa mga naunang nakasubok sa mga bagong kagamitan.
Bukod sa pagiging lugar para sa paglilibang, itinuturing itong hakbang patungo sa pagpapalakas ng “family bonds” at komunidad.
Inaasahang magiging venue din ito para sa mga palaro, community gatherings, at mga programang pangkabataan ng munisipyo.
Ang “Iba Municipal Playground” ay matatagpuan sa “Iba Municipal Grounds” at bukas na para sa lahat ng mga residente.
