Sa lumabas na pagdinig ng Senate Blue Ribbon na mahigit 700 na puno ang pinutol ng developer ng Monterrazas de Cebu project nang walang permit mula sa Department of Environment and Natural Resources (DENR).
Pinuna ni Senadora Risa Hontiveros ang DENR Environmental Management Bureau (EMB) – Region 7 kung bakit nakalusot at nabigyan ng environmental compliance certificate (ECC) ang The Rise at Monterrazas sa Cebu sa kabila ng pagtutol ng mga residente na nakatira sa paanan ng bundok at ilang civil society group.
Mistulang nagbulag-bulagan aniya ang mga opisyal ng DENR at EMB.
Ayon naman sa DENR Region 7, may mga paglabag ang developer ng Monterrazas sa kanilang ECC.
May dalawa umanong retention pond na nag-collapse o nasira na nakaambag sa matinding pagbaha sa lalawigan.
Higit 700 na puno rin ang pinutol ng developer nang walang permit kaya mahaharap sila sa kasong kriminal bukod sa pagtatanim ng punong kahoy kapalit ng kanilang mga pinutol.
Sa ngayon anila ay tigil-operasyon ang developer pero tuloy sa pagkukumpuni sa mga nagibang retention pond.
