Pormal na tinanggap ni Provincial Government Department Head ng PDRRMO-Zambales Rolex E. Estella ang ipinagkaloob ng Department of Science and Technology Region III (DOST III) ang Mobile Command and Control Vehicle (MOCCOV) para sa Pamahalaang Panlalawigan ng Zambales.
Ito ay bahagi ng Community Empowerment thru Science and Technology (CEST) program na naglalayong palakasin ang kahandaan sa sakuna sa Gitnang Luzon na isa sa pangunahing proyekto ni Zambales Governor Hermogenes Jun Ebdane Jr.
Isinagawa ang turnover sa pagbubukas ng 2025 Regional Science, Technology, and Innovation Week (RSTW) sa Malolos Sports and Convention Center, Lungsod ng Malolos, Bulacan, noong Miyerkules, Nobyembre 12, na may temang
“Siyensya, Teknolohiya, at Inobasyon: Kabalikat sa Matatag, Maginhawa, at Panatag na Kinabukasan.”
Ayon kay Gov. Ebdane, ang MOCCOV ay makabagong teknolohiya para sa komunikasyon, surveillance, at mga sistema ng triyaj (triage systems), at magsisilbing mobile hub para sa mabilis at epektibong koordinasyon sa panahon ng mga emergency at kalamidad.
Layunin din ng Gobernador na gamitin ito sa 13 bayan ng lalawigan para lalong mapalakas ang operasyong pang-suporta sa emergency bago, o pagkatapos ng mga sakuna at kalamidad.
Patunay ito ng patuloy na ugnayan ng DOST at ng Pamahalaang Panlalawigan ng Zambales sa paggamit ng makabagong teknolohiya para sa mas ligtas, matatag, at maunlad na lalawigan.
