MANILA —Pormal nang hiniling ng Department of Foreign Affairs (DFA) sa pamahalaan ng Iran na ituring ang Pilipinas bilang isang “non-hostile country” upang matiyak ang ligtas na pagdaan ng mga barkong may bandilang Pilipino at mga shipment ng langis sa gitna ng tensiyon sa West Asia.
Ito ang kinumpirma ni Palace Press Officer Usec. Claire Castro ngayong Miyerkules, kasabay ng pagpupulong nina Foreign Affairs Sec. Theresa Lazaro at Department of Energy Sec. Sharon Garin kay Iranian Ambassador sa Pilipinas na si Yousef Esmaeilzadeh noong Abril 1, 2026.
Ayon kay Castro, pangunahing tinalakay sa nasabing pagpupulong ang kahilingan ng Pilipinas na mabigyan ng katiyakan ang kaligtasan ng mga sasakyang pandagat ng bansa, partikular sa Strait of Hormuz—isang estratehikong daanan ng langis na madalas na sentro ng mga geopolitical tension.
“Mahalaga ito para maprotektahan ang interes ng Pilipinas, lalo na’t patuloy ang pag-angkat natin ng langis at mayroon tayong mga marinong nagtatrabaho sa rehiyon,” ani Castro sa isang press briefing.
Sinabi rin ng opisyal na positibo naman ang naging pagtanggap ng panig Iran sa pakiusap ng bansa, bagama’t hindi nagbigay ng karagdagang detalye ang Palasyo kaugnay ng naging tugon ng embahador.
Ang Strait of Hormuz ay itinuturing na isa sa pinakamahalagang chokepoint ng pandaigdigang kalakalan ng langis, kung saan dumadaan ang halos 20 porsiyento ng global petroleum consumption.
Patuloy namang pinag-aaralan ng Department of Energy ang epekto ng anumang posibleng pagkaantala sa suplay ng langis sa bansa kung sakaling lumala ang tensiyon sa naturang rehiyon.
