LUNGSOD NG MANILA, Philippines— Aabot sa mahigit 15 na magsasaka ang nagsampa ng reklamo laban kay dating presidential spokesperson na si Harry Roque at ilang iba pa kaugnay ng umano’y land-grabbing scheme, ayon sa National Bureau of Investigation (NBI) nitong Lunes.
Ayon sa NBI, pormal na naghain ng kanilang sinumpaang salaysay ang 15 hanggang 20 magsasaka sa tanggapan ng NBI-National Capital Region, kasabay ng paghahain ng mga sumusuportang dokumento para sa reklamo.
Sa kanilang reklamo, inilahad ng mga magsasaka na ang mga lupang saklaw ng Certificates of Land Ownership Award ay inilipat sa isang pribadong korporasyon na umano’y sangkot sa Philippine Offshore Gaming Operations na may kaugnayan sa ilang personalidad, kabilang si Roque, nang walang kinakailangang clearance mula sa Department of Agrarian Reform.
“Ang paunang impormasyon ay nagpapahiwatig din ng posibleng pamemeke ng dokumento sa pagproseso at paglipat ng mga titulo ng lupa, na nagdudulot ng seryosong pag-aalala sa legalidad at bisa ng mga transaksyon,” pahayag ng NBI.
Dahil dito, sinabi ng NBI na nagsasagawa na ito ng masusing pagbuo ng kaso upang matukoy ang pagkakaroon ng probable cause at makilala ang lahat ng indibidwal na maaaring managot sa kriminal na pananagutan.
Ang reklamo laban kay Roque ay kasabay ng pagharap na niya sa qualified human trafficking case dahil sa umano’y pagkakasangkot niya sa operasyon ng scam hub na Lucky South 99 sa Porac, Pampanga.
Sa ngayon ay kasalukuyan siyang nasa Netherlands, kung saan sinasabing naghahanap siya ng asylum.
