Iginiit ng Islamic Revolutionary Guard Corps ng Iran na hindi nila papayagang makalabas ang kahit isang patak ng langis mula sa Middle East hangga’t hindi ganap na natitigil ang mga ginagawang pag-atake ng United States at Israel laban sa kanila.
Sa isang pahayag, nilinaw ng tagapagsalita ng IRGC na sila ang magdidikta kung kailan matatapos ang labanang ito.
“Kami ang magpapasya kung kailan matatapos ang digmaan,” ayon sa tagapagsalita ng rebolusyonaryong guards.
Ito ay kasunod ng panibagong babala ni dating US President Donald Trump na posibleng maglunsad ang Amerika ng mas matinding opensa laban sa Iran kapag tuluyan nitong hinarang ang daloy ng langis sa rehiyon.
“We will hit them so hard that it will not be possible for them or anybody else helping them to ever recover that section of the world,” ayon kay Trump.
Binigyang-diin pa ni Trump na anumang pagtatangka ng Iran na hadlangan ang pagdaloy ng langis sa Strait of Hormuz ay sasagutin ng Amerika ng puwersang 20 beses na mas matindi kaysa sa mga naunang welga.
“If Iran does anything that stops the flow of oil within the Strait of Hormuz, they will be hit by the United States of America 20 times harder than they have been hit thus far,” sagot ni Trump.
Patuloy na binabantayan ng pandaigdigang merkado ang posibleng epekto ng tensyong ito sa supply ng langis, lalo na’t ang Strait of Hormuz ay itinuturing na isa sa pinakamahalagang daanan ng langis sa buong mundo.
