LAGUNA – Lalo pang bumaba ang sukat ng tubig sa Laguna de Bay habang patuloy na nararanasan ang matinding tag-init sa bansa, base sa bagong ulat mula sa Laguna Lake Development Authority (LLDA).
Ayon sa tala ng ahensya nasa 11.58 metro na lamang ang lebel ng lawa ngayong linggo. Ito ay mas mababa kumpara sa 12.50 metrong “critical level” na itinakda ng ahensya.
Ipinaliwanag ng LLDA na ang pangunahing dahilan ng pagbaba ay ang matinding evaporation o pagsingaw ng tubig dulot ng mataas na temperatura, kasabay ng tuloy-tuloy na paglabas ng tubig mula sa lawa patungo sa karagatan sa pamamagitan ng Napindan Channel. Dahil sa kawalan ng sapat na ulan, hindi napupunan ng mga ilog at iba pang tributaryo ang nawawalang tubig.
Dahil dito, naglabas ng babala ang ahensya sa mga sektor na umaasa sa lawa—lalo na sa mga mangingisda at magsasaka sa paligid nito—na maghanda para sa posibleng epekto ng tuloy-tuloy na pagbaba ng tubig. Maaari rin itong makaapekto sa kalidad ng tubig at sa mga kabuhayang nakadepende dito.
Patuloy namang mino-monitor ng LLDA ang sitwasyon at nakikipag-ugnayan sa mga lokal na pamahalaan upang matiyak ang kaligtasan at kabuhayan ng mga residente habang nagpapatuloy ang dry season.
