SUBIC BAY FREEPORT — Puspusan ngayon ang Bureau of Immigration (BI) para hanapin ang isang Amerikanong may hatol sa kasong “fraud”matapos itong makatakas sa dapat sana’y summary deportation.
Ito ay ayon sa legal counsel na si Atty. Laddie B. Barredo ng Barredo Law Office sa Lungsod ng Olongapo.
Ang nasabing dayuhan ay kinilalang si Timothy Desmond na dating CEO ng Subic Bay Marine Exploratorium Incorporated (SBMEI) ng Ocean Adventure, na may may order na final deportation noon pang 2016 dahil sa panloloko nito umano ay nakakuha ng daan-daang milyong piso mula sa mga investors ng naturang theme park.
Si Desmond ay nahatulan din sa kasong “perjury”na kaugnay sa malawakang corporate “fraud scheme”.
Ayon kay Barredo, maling napalaya ng Olongapo City District Jail ang 76-anyos na Amerikano matapos irekord na ito ay na-turn over umano sa isang satellite office ng Bureau of Immigration — bagay na tinutulan ng abogado dahil walang aktuwal na turnover na naganap.
Giit pa nito, matapos ang dalawang dekadang paglilitis upang makamit ang hustisya, “isang pirma lamang” ng jail official ang pumigil sa dapat na deportation ng nasabing dayuhan.
“Where is the accountability?” tanong ni Barredo, na iginiit na nagampanan ng BI at ng mga hukuman ang kanilang tungkulin ngunit bigong mailipat sa tamang kustodiya ang dayuhan.
Dagdag pa ng abogado, dapat ay awtomatikong inilipat si Desmond sa BI detention facility matapos ang sentensiya nito, alinsunod sa Commonwealth Act No. 613 o Philippine Immigration Act of 1940 at Rule 9 ng BI para sa Summary Deportation proceedings.
Sa ngayon, hindi pa natutunton ang kinaroroonan ni Desmond habang nananatiling epektibo ang deportation order laban sa kaniya.
Nanawagan ang Barredo Law Office sa publiko na iwasang lapitan ang dayuhan at agad makipag-ugnayan sa Bureau of Immigration sakaling makita ito.
