Muling nanawagan si Navotas Rep. Toby Tiangco sa Kamara de Representantes na isapubliko kung magkano ang alokasyon ng bawat kongresista sa pondo ng Department of Public Works and Highways (DPWH) para sa 2026 national budget.
Ayon kay Tiangco, dapat ay naka-post na sa website ng Kamara ang listahan ng mga proyekto at halaga kada distrito mula pa noong Oktubre 13, araw na inaprubahan sa ikatlo at huling pagbasa ang 2026 General Appropriations Bill (GAB).
“Bakit ba ayaw i-post ito? Ano ba ‘yong tinatago? Kung hindi nila pinost ‘to, hindi totoo ‘yong sinasabing transparency,” giit ni Tiangco.
Sinabi pa ng mambabatas na sumulat siya noong Oktubre 20 kay House Committee on Appropriations Chairperson Mika Suansing para ipaalala ang kanyang kahilingan, ngunit hanggang ngayon ay wala pa ring tugon o anumang publikasyon mula sa komite.
“Lampas na ‘yong 15 days. Dapat may sagot na siya sa akin. Pero hanggang ngayon, tahimik pa rin at walang listahan sa website ng Congress,” dagdag ni Tiangco, na binanggit ang Republic Act 6713 o ang Code of Conduct and Ethical Standards for Public Officials and Employees na nag-aatas na sagutin ang mga request sa loob ng 15 araw.
Binunyag din ng kongresista na dalawang proyekto ang inilaan sa Navotas para sa 2026 na nagkakahalaga ng tig-₱3 milyon bawat isa — ngunit hindi umano alam ng lokal na pamahalaan, barangay, City Health Office, o District Engineering Office kung sino ang nagpasok ng mga ito.
“Naging transparent daw sa proseso ng budget, pero sa end result, ayaw ipakita. Ang tanong, ano bang tinatago dito at ayaw ipakita ‘yon?” mariing tanong ni Tiangco.
